Wuměłstwo wobsedźi magiju, předobyć so k potajnstwam duše,

wuwabić a zwuraznić začuća,

zanurić so do sfery  njeprajeneho – prajeneho – njeprajomneho,

słyšeć prašenje „Što postaja naše žiwjenje?“

a pósłać swětło do hłubinow čłowječeje wutroby.

Z wulkim wjeselom zhladujemy wróćo na wuspěšnu premjeru festiwala “ZymskaKlasika”, kotryž lětsa w januaru prěni raz swój publikum na jimacu hudźbnu jězbu sobu wza. Ze zahoritosću směmy tuž pokročowanje “ZymskejeKlasiki” přizjewić. Pod inspirěrowacym hesłom “zynkowe puće Via Regia: swjedźeń hudźby a słowow” přeprošujemy Was, z nami sej wotkryć historisku Via Regia – hudźbna a poetiska ekspedicija, kotraž Paris a Kiew na slědach legendarneje wikowanskeje čary zwjazuje.

 

Wosrjedź zymneje pychi zymy , runje tam, hdźež historiska Kralowska dróha wobkuzłace město Budyšin blisko Drježdźan prěči, zaswěći so ZymskaKlasika jako swěćacy swjedźeń kulturneje wuměny a wuměłskeje zwjazanosće. Serbski muzej, městnosć, bohata na stawizny a kulturu, słuži jako perfektna kulisa za tutón wosebity hudźbny podawk, kotryž prezentuje kulturnu mnohotnosć a zhromadne herbstwo podłu tuteje stareje wikowanskeje dróhi.

 

Přez Budyske historiske hasy, kotrež běchu něhdy dźěl žiweje Via Regia, předźe Zymska Klasika překrasne płatno ze zwukow a emocijow, kotrež jenož stawizny a sony čłowjekow  nječesći, kotřiž po tutej čarje pućowachu, ale tež wažnu rólu Budyšina jako kulturne srjedźišćo tutoho regiona wuzběhnje.

 

Kóždy koncert festiwala swědči hłuboko wo tym, kak sylnje zamóža hudźba a basnjenje zwjazujo skutkować, daloko přez kulturne hranicy.  Hudźba a basnjenje stej žiwy dopokaz za wuměłstwo jako njepowalny zwjazowacy móst, kotryž přewinje z lochkosću rěčne, časowe a hranične barjery. Tak njeda mnohostronske zwiski mjez kulturami Europy jenož nazhonić, ale čini je tež widźomne. 

 

ZymskaKlasika wotewrja wrota šěroko za fascinowacu jězbu, na kotrejž móže so publikum zanurić do połnosće hudźbnych a poetiskich drohoćinkow, kotrež su podłu wikowanskeje dróhi rozkćeli.  Při tym sadźimy w našim programje wědomje akcent na serbsku kulturu a rěč, kotrejž njejstej jenož hłuboko w identiće regiona zakorjenjenej, ale kotrejž matej tež historisce wusahowacy wuznam.

 

Wjeselimy so na to, Was na wosebitu jězbu witać směć a zhromadnje z Wami njezapomnite wokomiki dožiwić.

 

Franziska Pietsch

nawodnica festiwala